💦 KARI SESANA_1
Mangsa langit lenglang, Kabuyutan lemah buhun diceungceurikan. Ngageuri jeroning ati ngadenge kunti suka seuri, Duruwiksa meunang bagja, setan siluman galumbira nempo tutunggul Sunda Wiwitan geus jadi sagara.
"Gusti..!?"
Jati Buhun ngajadi saksi ugeran kasarakahan manusa manusa abdi dunyawi.
Nu tingkoceak, nu ngabangingik kanyerian ku lemah sarakan geus kakeueum angkara alesan kamajuan kahirupan. Mangrewu jirim ngalanglayung, mangyuta ringkang ngababatang melaan nu hamo bisa dibelaan.
Didieu nyakseni, sagala pangaboga ilang taya tapakna. Urang Sunda leungiteun kaSundaanana. Jati kasili junti lali ka basa jeung rengkakna. Leungit ciri pribadina.
Ambuing gening Gamparan,
Kasarakahan ngagunasika rasa kamanusaan, mending dewek hanteu batur.
Geura tumpurkeun kaangkuhan nu nyangkaruk dina rasa manusa, sabab kadunyaan bakal ngancurkeun kayakinan dina dirina. Mupusti jirimna lain Gustina.
Ngaku kana kawasana.., poho kanu Maha Ngersakeuna. Jul jol ti ditu ti dieu ngaku Raja turunan Raja.
Nu nyata saukur Rajawisuna..!!!
Nutup rasa nungkup pangrungu muga bisa nyakseni ngagebrayna lalangit buana Buhun ngancurkeun sagara ciciptan, numpurkeun Duruwiksa nu geus ngacak ngacak buana.
Titisan titisan jatining Sunda bakal narembongan, kawas bentang satitik tengahing sagara peteng.
Sunda nu geus ilang kasundaana tingbalieus nutup kaera. Ilang jati ilang pribadina..., Ilang diri turunana.
" Laa ilaha ilallah...
Cacandran ti gunung Surian jadi hiji katangtuan.
Mangka sayaga..
Geura tatan tatan balikeun deui ka asal dimana mustika ati geus pareum cahyana. Panca giri ngajadi saksi hudangna Mahkuta Darma Kamanusaan nu geus dikotretkeun ti AsalNa.
Sumedang Ngarangrangan
Kadipaten Kapapaten
Tomo Kapolostomo
Cirebon Kabongbodasan
Indramayu Kalalayuan
Ujungjaya Ujung Kajayaan
Cihanyir Tinggal Hanyirna
Panadahan Pangumbahan
Warung Peti Tempat Mayitna.....
Hanca🙏🙏🙏
💦 KARI SESANA_2
Ngelebet umbul umbul ti beh Wetan mere ciri kasarakahan,
Kakawasaan geus masung jirimna ngaku NU murbehing alam
Mangka geuing.., lain alam nu numpurkeun kahirupan arinyana sakabeh, tapi napsu, hianat jeung kaangkuhan nu ngancurkeun diri pribadina.
Mangsa leburna Lelemah Kabuyutan, Ci Kahuripan ukur babasan
Surian panceg tetep nyakseni.
Nagara jadi Padang Kuruseta, perang sadulur silihlindih kakawasaan..
Pitenah ngabaju dina lisan lisan Pangawasa titisan Duruwiksa !
Silihsigeung wadal dewek tandon alas.
Geus teu wawuh duduluran
Tingkaretip silalatuan Pasukan Pasukan Medang nguniang ngaregreg ngajaga ti beh kidul ku rasana.
Nyakseni.. tanpa sora, angin handaruan gelap saleser jadi aweuhanana.
Tingpucunghul narembongan lunturna ahlak manusa alatan ancurna budaya, adat kulampah arinyana
Ngamitoskeun.. ngaharamkeun kalindih aturan bangsa nu lian
Sukma Pertiwi ngageuri deui..
Ringkang Nusantara taya hargana dimata deungeun
Ancur ku rebutan alas,
Pacorok sieun teu seubeuh !
Hibar layung ti beh wetan nganti Jatining Sukma nembongan ngaranggeum sorot cahya Duruwiksa nu ngajega..
Di dinya bedahna sagara ciciptan ngalebur setan siluman nu suka suka lalayaran guyang maksiat jeung basilat.
Nu ngahianat Lemah Buhun tangtu nampa akibatna..
Geura elingan saacan pati narajang alas.., muga pati teu peurih teuing
Geura nyaring Jungjunan..
Mangka tetep dina aturan najan hianat beuki mahabu.
Leburna Duruwiksa geus jadi kapastian alatan Lemah Wiwitan.
Mawa ragi ka Cilutung, tikukur ngudag saeran ..
Rek rugi atawa untung, kudu sukur ka Pangeran..
Cag 🙏🙏
Komentar
Posting Komentar